ضميرى
آه يا ضميرى يا رزيل
طول عمرى وإنت بلوتى
فى ساعة الصفو الجميل
تقطع عليا نشوتى
وتهفنى توشيح
كأنه شربة شيح
أصرخ بعزم قوتى
يا دهوتى
*****
فيه ناس كتير من غير ضمير
مش زعلانين من قلته
وإشمعنى أنا فى عكننة
من الضمير ومعاملته
على أى غلطة يشكنى
وف أوضه ضلمه يسكنى
يربطنى فى عمود السرير
ومستحيل يفكنى
ويدقنى بمسامير
ويدور المزامير
أصرخ بعزم قوتى
يا دهوتى
*****
حتة شريك لكن عاديك
دماغه أنشف م الخشب
نخرج سوا نشم الهوا
يعمل فصول لها العجب
نلاقى مثلا محفظة
على الرصيف .. مكلبظة
يشاورلى على قسم البوليس
ويملا مخى بموعظة
أجى أزوغ يقول يا غفير
ويبقى درس مرير
أصرخ بعزم قوتى
يا دهوتى
*****
فى مره كنت باحب بنت
وقعدت يجى فوق عن سنة
فى المواعيد أقعد بعيد
علشان ضميرى فى وسطنا 
هجرتنى صممت أنتقم
وأبقى ولد شرير لئيم
لكن ضميرى عضنى
ورفسنى خلانى أنكتم
وإدانى فى المناخير
خلانى أقول يا مجير
وأصرخ بعزم قوتى
يا دهوتى
****
ليه بس ليه يا ضميرى بيه
مالينى همه ولحلحه
عاجبك كده بالشكل ده
بقيت كبير فى المصلحة
والشغل فوقى تلول تلول
وعرقى مرقى سيول سيول
وأكبر وتكبر علتى
وأعلى وتعلالى الحمول
يا سالقنى ع البواجير
مضايقنى قوى يا ضمير
بأصرخ بعزم قوتى
يا دهوتى
ياا دهوتى
يااا دهوتى
صلاح جاهين :
09-10-2010, 05:04 PM
صلاح جاهين .. آه يا ضميرى
رد: صلاح جاهين .. آه يا ضميرى
